திங்கள்நகர் – அழகியமண்டபம் மாநில நெடுஞ்சாலை நெய்யூரில் இரட்டை ரயில் பாதைக்காக மேம்பாலம் அமைக்கும் பணிகள் நடந்து வருகிறது. இதனால் வாகனங்கள் மாற்றுப்பாதையில் திருப்பி விடப்பட்டுள்ளன. அழகியமண்டபத்தில் இருந்து பரம்பை, இரணியல் ரயில் நிலையம், நெய்யூர் வழியாக வந்து செல்கின்றன.
இதனிடையே தற்காலிக சாலையான பரம்பரை – இரணியல் ரயில் நிலையம் சாலை இரணியல் தொட்டிப்பாலம் சீரமைப்புக்குப் பின் சேறும் சகதியுமாக மாறிவருகிறது. இதனால் அப்பகுதியில் அடிக்கடி போக்குவரத்து நெருக்கடி ஏற்படும் சம்பவங்களும் நடந்து வருகிறது.
இந்த நிலையில் தற்காலிக சாலையில் போக்குவரத்தை நிறுத்தி விட்டு மாற்றுப் பாதையில் வாகனங்களை திருப்பி விட போலீசார் முடிவு செய்துள்ளனர். அதன்படி
திங்கள்நகரில் இருந்து திருவிதாங்கோடு, அழகியமண்டபம் செல்லும் கனரக வாகனங்கள் திங்கள்நகர் ரவுண்டானா, இரணியல் ஜங்ஷன், ஆழ்வார்கோயில், கல்குறிச்சி, தக்கலை நீதி மன்றம் வழியாக செல்ல வேண்டும்.
அதேபோன்று அழகியமண்டபம், திருவிதாங்கோட்டில் இருந்து திங்கள்நகர் வரும் வாகனங்கள் திருவிதாங்கோடு, வட்டம், ஆழ்வார்கோயில், இரணியல் ஜங்ஷன் வழியாக திங்கள்நகர் வரும் வகையில் ஒருவழிப் பாதையாக போக்குவரத்து மாற்றம் செய்யப்பட்டு உள்ளது. இந்த போக்குவரத்து மாற்றம் செப்டம்பர் 30ம் தேதி முதல் அமலுக்கு வருகிறது. பொதுமக்கள், வாகன ஓட்டுநர்கள் முழு ஒத்துழைப்பு வழங்க கேட்டுக் கொள்ளப் படுகிறார்கள்.